[marcoszorrilla]

Un buen amigo gallego me regalo un libro en una ocasión ya hace años, pero siempre me recuerdo de el "Suso" y del libro "» Catecismo do labrego galego / Marcos Da Portela"

CATECISMO DO LABREGO GALEGO


Como que xa o coñecedes porque o fun publicando pouco a pouco, non preciso decirvos que se trata dun libriño que ten o cheiro, o sabor e o color da nosa terriña. Todo o que nel se dí está resumido no dibuxo da portada que ahí vai tamén. O coitadiño paisano galego marcha, camiño do Calvario, levando sobre do lombo a pesada cruz das suas calamidades e disgracias. Atado polo pescozo cunha corda, da que turra un ministro, vai escoltado por un xeneral e un señor. Todos tres fan co infeliz Xan Paisano o oficio que fixeron os xudíos co Noso Señor, e alá vai o probe caíndose a cada dez pasos co peso do madeiro, i exposto a esganarse coas turradelas de corda que lle dá o ministro pra que se espavile.

Todalas disgracias que vos suceden, todalas inxusticias que fan con vosoutrosdalas agunías porque pasades verédelas no Catecismo, meus queridos compañeiros de monteira. Elo parece que está feito en broma, pro ríndo, ríndo, vaise mallando nos que de tan mal xeito nos poñen, pois xusto é que xa nonos deixan máis dereito que o do pataleo, o exercitemos ben i en debida forma.

Como sei que os cartos andas polas nubes, púxenvos o Catecismo ao precio máis barato que puden. Pra os suscritores do TIO MARCOS non custa máis que un real, e dous pra os que nono son. E xusto que aos que me axudan polo ano adiante, se lles dean as cousas a menor precio. Por suposto que esto non vai máis que cos que pagan relixiosamente a sua suscrición, pois pra os que se empeñan en lérme de moca, teño eu unha moi grande detrás da porta pra quitarlles as malas mañas de recibir o periódico, facerme traballar todo o ano coa pluma, que é pior que traballar cunha aixada, e logo roubarme as cadelas e deixarme sin pan que levar á boca, e facerme andar coa monteira vella e os calzós con dous buratos onde todos sabedes.

E non vos digo máis, meus vellos: mercade o Catecismo do Labrego, que logo vos habedes de rir un pouco e darme as gracias, porque é un libriño que se fixo por vosoutros e pra vosoutros.

("O TIO MARCOS DA PORTELA " Parrafeos co pobo galego. -Ano once, Ourense, 26 de maio do 1889. Parrafeo 277. Páxina 7. -Vai ilustrado coa gravura da portada, ao seu tamaño).

Enlace.

Un Saludo especialmente al bimilenario junior